आठौँ विश्व गोजुरियो कराते प्रतियोगिताको पहिलो दिनमै गौरीगंगाका खेलाडीको दबदबा, ३ स्वर्णसहित ६ पदक
कैलाली — भारतको पुणेमा अक्टोबर ५ देखि १०, २०२६ सम्म सञ्चालन भइरहेको आठौँ विश्व गोजुरियो कराते प्रतियोगिता (8th WGKF) को पहिलो दिनमै नेपालको प्रतिनिधित्व गरेका गौरीगंगा डोजोका खेलाडीले उत्कृष्ट प्रदर्शन गर्दै ३ स्वर्णसहित ६ पदक जितेका छन्।
राष्ट्रिय छनोटमा उत्कृष्ट प्रदर्शन गर्दै नेपालको प्रतिनिधित्व गर्ने अवसर पाएका गौरीगंगा कराते डोजोका प्रशिक्षक अशोक चन्दसहित ६ खेलाडी प्रतियोगितामा सहभागी हुन भारतको पुणे प्रस्थान गरेका थिए। नेपालबाट प्रतियोगितामा कुल ३३ खेलाडी सहभागी भएका छन्।
प्रतियोगिताको पहिलो दिन गौरीगंगा डोजोका खेलाडीले विभिन्न उमेर तथा तौल समूहमा प्रतिस्पर्धा गर्दै स्वर्ण, रजत र कांस्य पदक जितेर नेपालको नाम अन्तर्राष्ट्रिय स्तरमा चिनाउन सफल भएका हुन्।
गौरीगंगा डोजोका खेलाडीले जिते ६ पदक
प्रतियोगिताको पहिलो दिन गौरीगंगा डोजोका तर्फबाट पदक जित्ने खेलाडीहरू यस प्रकार छन् :
– विवेक शाही — ३२ केजीभन्दा माथि तौल समूहमा स्वर्ण पदक
– राधिका धामी — ३७ केजीमुनि तौल समूहमा स्वर्ण पदक
– मनिषा मस्की मगर — ४५ केजीभन्दा माथि तौल समूहमा स्वर्ण पदक
– पारस बडैला — २७ केजीमुनि तौल समूहमा रजत पदक
– जनक सार्की — ५० केजीमुनि तौल समूहमा रजत पदक
– आशिका विक — ४५ केजीमुनि तौल समूहमा कांस्य पदक
पहिलो दिनमै गौरीगंगा डोजोका खेलाडीले तीन स्वर्ण, दुई रजत र एक कांस्य गरी कुल ६ पदक जित्दै उत्कृष्ट नतिजा निकालेका हुन्।
नेपाली खेलाडीको अन्तर्राष्ट्रिय प्रतियोगितामा उत्कृष्ट प्रदर्शन
सोही दिन नेपालका अन्य खेलाडीले पनि विभिन्न तौल तथा प्रतिस्पर्धा विधामा पदक जितेका छन्। प्राप्त विवरणअनुसार सन्ध्या श्रेष्ठले स्वर्ण, चेलिफुङ लिम्बूले कांस्य, अन्भी शाहीले रजत तथा कांस्य र वान्स श्रेष्ठले रजत पदक हासिल गरेका छन्।
नेपाली खेलाडीको यस सफलताले अन्तर्राष्ट्रिय खेलकुदमा नेपालको उपस्थिति थप बलियो बनाउनुका साथै आगामी दिनमा कराते खेलप्रति युवाको आकर्षण बढाउनसमेत सहयोग पुग्ने अपेक्षा गरिएको छ।
प्रशिक्षक अशोक चन्दको मेहनतले गौरीगंगाको पहिचान अन्तर्राष्ट्रिय स्तरमा
सीमित स्रोतसाधनका बाबजुद गौरीगंगा डोजोका खेलाडीले राष्ट्रिय तथा अन्तर्राष्ट्रिय प्रतियोगितामा निरन्तर पदक जित्दै आउनु खेल क्षेत्रका लागि उत्साहजनक उपलब्धि बनेको छ। प्रशिक्षक अशोक चन्दको निरन्तर मेहनत, खेलाडीको अनुशासन र अभ्यासले गौरीगंगालाई मात्र नभई देशकै पहिचान अन्तर्राष्ट्रिय स्तरमा स्थापित गर्न योगदान पुर्याएको छ।
प्रशिक्षक चन्दले खेलाडीले गरेको मेहनतको परिणाम पदकका रूपमा प्राप्त हुँदा आफूलाई छुट्टै खुसी र गर्वको अनुभूति हुने बताएका छन्।
उनले स्थानीय सरकार, खेलकुद मन्त्रालय तथा नेपाल सरकारले खेलाडी र प्रशिक्षकलाई आवश्यक स्रोतसाधन, प्रशिक्षण सुविधा र प्रोत्साहन उपलब्ध गराउन सके आगामी दिनमा अझ उत्कृष्ट नतिजा हासिल गर्न सकिने विश्वास व्यक्त गरेका छन्।
सीमित सुविधाबीच पनि अन्तर्राष्ट्रिय मञ्चमा पदक जितिरहेका गौरीगंगा डोजोका खेलाडीको सफलताले खेल प्रतिभाको विकासका लागि पर्याप्त अवसर, पूर्वाधार र सरकारी सहयोग कति महत्त्वपूर्ण छन् भन्ने सन्देश दिएको छ।
आठौँ विश्व गोजुरियो कराते प्रतियोगिताको पहिलो दिनको उपलब्धिले गौरीगंगा डोजो र नेपाली खेलकुद क्षेत्रमा उत्साह थपेको छ। प्रतियोगिताका आगामी दिनमा पनि नेपाली खेलाडीले उत्कृष्ट प्रदर्शन गर्दै थप पदक जित्ने अपेक्षा गरिएको छ।
— खबरधारा डटकम
यो खबर पढेर तपाईलाई कस्तो महसुस भयो
