कैलाली क्षेत्र नम्बर ५ मा सम्पन्न प्रतिनिधि सभा सदस्य निर्वाचनसँग सम्बन्धित एक गम्भीर आरोप सार्वजनिक भएको छ। नेपाली काँग्रेसका उम्मेदवार नरनारायण शाहले आफ्नै पार्टीभित्रका केही नेताहरू चुनावका बेला विपक्षी उम्मेदवारबाट आर्थिक लाभ लिएको दाबी गरेका छन्।
शाहका अनुसार नेकपा सम्बद्ध उम्मेदवार प्रेमबहादुर आलेले आफूलाई नै भेटेर रकम लिने काँग्रेस निकट ५७ जना व्यक्तिहरूको सूची उपलब्ध गराएको बताएका छन्। उनले पार्टीको नेतृत्व तहसम्मका व्यक्तिहरू यस प्रकरणमा संलग्न हुन सक्ने संकेत समेत गरेका छन्।
यद्यपि, उनले आरोपित व्यक्तिहरूको नाम सार्वजनिक गर्न अस्वीकार गरेका छन्। नाम सार्वजनिक गर्दा पार्टीभित्र ठूलो विवाद उत्पन्न हुने र संगठनमा नकारात्मक असर पर्ने उनको भनाइ छ। साथै, कति रकम लेनदेन भयो र कसले कति लियो भन्नेबारे पनि उनले खुलाउन चाहेनन्।
उक्त आरोप सार्वजनिक भएसँगै सामाजिक सञ्जालमा व्यापक बहस सुरु भएको छ। धेरै प्रयोगकर्ताहरूले पारदर्शिताका लागि आरोपित व्यक्तिहरूको नाम सार्वजनिक गर्न माग गरिरहेका छन्।
उक्त निर्वाचनमा राष्ट्रिय स्वतन्त्र पार्टीका उम्मेदवार चन्द विजयी भएका थिए। उनले ३१ हजार ९५३ मत प्राप्त गरेका थिए। काँग्रेसका शाहले ११ हजार ९५८ मत ल्याउँदा आले ७ हजार ८७६ मतसहित तेस्रो स्थानमा सीमित भएका थिए।
हालसम्म यस आरोपबारे अन्य सम्बन्धित पक्षबाट कुनै आधिकारिक प्रतिक्रिया आएको छैन।
यो खबर पढेर तपाईलाई कस्तो महसुस भयो
