टीकापुरमा सैपाल युथ क्लबको शानदार जित, सीता भुल बनिन् ‘प्लेयर अफ द म्याच’
टीकापुर । कैलालीको टीकापुरस्थित वीरेन्द्र खेलमैदान मा जारी “युथ अफ टीकापुर प्रथम महिला खुला फुटबल प्रतियोगिता–२०८३” अन्तर्गत दोस्रो दिनको खेलमा सैपाल युथ क्लबले लम्की फुटबल एण्ड ट्रेनिङ सेन्टरलाई २–० गोल अन्तरले पराजित गरेको छ।
खेलको सुरुवातदेखि नै आक्रामक प्रदर्शन गरेको सैपाल युथ क्लबले पहिलो हाफमै दुई गोल गर्दै खेल आफ्नो पक्षमा पारेको थियो। खेलको १०औं मिनेटमा तृप्ती कपाडीले आकर्षक गोल गर्दै टोलीलाई अग्रता दिलाइन् भने २०औं मिनेटमा सीता भुलले अर्को गोल थप्दै अग्रता दोब्बर बनाइन्।
दोस्रो हाफमा लम्की फुटबल एण्ड ट्रेनिङ सेन्टरले खेलमा फर्किने प्रयास गरे पनि सैपालको मजबुत डिफेन्स र उत्कृष्ट तालमेलका कारण गोल गर्न सकेन। निर्धारित समयसम्म थप गोल हुन नसक्दा सैपालले सहज जित हात पार्यो।
खेलमा उत्कृष्ट प्रदर्शन गर्दै निर्णायक गोल गरेकी सीता भुल “प्लेयर अफ द म्याच” घोषित भइन्।
यता प्रतियोगिताअन्तर्गत १४ जीआर एफसी र एनवाइएमईएस बर्दियाबीच हुने तय भएको खेल भने प्राविधिक कारणले एक दिनका लागि स्थगित गरिएको आयोजकले जनाएको छ। अब उक्त खेल वैशाख ३० गते दिउँसो १ बजे सोही मैदानमा सञ्चालन हुनेछ।
महिला खेलाडीहरूको क्षमता अभिवृद्धि, आत्मविश्वास विकास तथा महिला फुटबलको प्रवर्द्धन गर्ने उद्देश्यले आयोजना गरिएको प्रतियोगितामा पश्चिम नेपालका विभिन्न जिल्लाका टोलीहरूको सहभागिता रहेको छ। प्रतियोगिताको विजेताले नगद रु. २ लाख २ हजार २ सय २२ रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले रु. १ लाख १ हजार १ सय ११ रुपैयाँसहित ट्रफी, मेडल र प्रमाणपत्र प्राप्त गर्नेछ।
प्रतियोगिताको फाइनल खेल जेठ ३ गते दिउँसो ३:३० बजे सञ्चालन हुने आयोजकले जनाएको छ।
यो खबर पढेर तपाईलाई कस्तो महसुस भयो
