मसुरिया, कैलाली | चैत्र ७, २०८२
कैलालीको गौरीगंगा नगरपालिका–८ स्थित जनप्रिय माध्यमिक विद्यालयमा विषय रुपान्तरणको निर्णयलाई लिएर विवाद चर्किएको छ। विद्यालय व्यवस्थापन समितिले आफ्ना निकटका व्यक्तिलाई जागिर खुवाउने उद्देश्यले आवश्यक नभएको विषयमा दरबन्दी परिवर्तन गर्न खोजेको आरोप लागेको छ।
विद्यालयमा दुई वर्षदेखि रिक्त रहेको समाजशास्त्र विषयको दरबन्दीलाई नेपाली विषयमा रुपान्तरण गर्ने निर्णय गरिएको हो। तर, माध्यमिक तहमा नेपाली विषयका पहिले नै दुई जना शिक्षक कार्यरत हुँदाहुँदै तेस्रो दरबन्दी थप्न खोजिएको भन्दै अभिभावकहरूले आपत्ति जनाएका छन्।
अर्कोतर्फ, कक्षा ९ देखि १२ सम्म अर्थशास्त्र विषयका लागि एक जना पनि शिक्षक नहुँदा अन्य विषयका शिक्षकमार्फत कामचलाउ रूपमा पढाइ भइरहेको छ। यसले विद्यार्थीको शैक्षिक गुणस्तरमा असर परेको गुनासो गरिएको छ।
अभिभावकहरूका अनुसार आवश्यक विषय बेवास्ता गर्दै अनावश्यक विषय थप्नु “नीतिगत भ्रष्टाचार” हो। उनीहरूले विद्यार्थीको भविष्यसँग खेलवाड भएको आरोप लगाएका छन्।
विद्यालयमा नेपाली विषयका शिक्षकहरूले नै पूरा पिरियड नपाएको अवस्था रहेको बताइन्छ। यसले नेपाली विषयमा शिक्षक आवश्यकता भन्दा बढी रहेको संकेत गर्छ।
यता, निर्णय प्रक्रियामै अन्योल देखिएको छ।
नगर प्रमुखले निर्णय प्रक्रिया अनुसार पारित भएको बताएका छन्।
प्रमुख प्रशासकीय अधिकृतले भने औपचारिक स्वीकृति नभएको दाबी गरेका छन्।
प्रधानाध्यापकले कुनै आधिकारिक पत्र प्राप्त नभएको बताएका छन्।
जिम्मेवार निकायबीच नै भनाइ बाझिँदा विषय रुपान्तरणको निर्णय कार्यान्वयनमा आएको हो वा होइन भन्नेमा अन्योल बढेको छ।
स्थानीय राजनीतिक दलहरूले पनि संयुक्त रूपमा निर्णयप्रति विरोध जनाउँदै तत्काल सच्याउन माग गरेका छन्। अन्यथा आन्दोलनमा जाने चेतावनी दिएका छन्।
शिक्षा क्षेत्रका जानकारहरूका अनुसार यस्तो अपारदर्शी र विवादास्पद निर्णयले दीर्घकालीन रूपमा विद्यार्थीको भविष्यमा नकारात्मक असर पार्न सक्छ।
सम्बन्धित निकायहरूले यथाशीघ्र निर्णयको वास्तविक अवस्था स्पष्ट पार्दै आवश्यक विषयमा शिक्षक व्यवस्थापन गर्नुपर्ने माग उठेको छ।
यो खबर पढेर तपाईलाई कस्तो महसुस भयो
